'O cunto 'e Mariarosa | Testo | Ernesto Murolo
Tarantelluccia.it

‘O cunto ‘e Mariarosa

Categoria: Testi canzoni napoletane
Data inserimento: 18 novembre, 2013
Autore: Lo Guarracino

(Ernesto Murolo 1932)

Ernesto Murolo, autore del testo di 'O cunto 'e Mariarosa

Figliole d’Antignano, bona gè’,
‘o cunto ‘e Mariarosa è chistu ccà.
Si have ragione e dámmole ragione,
e si have tuorto e dámmole ragione,
ca sempe have ragione chi vò’ bene.
Sole d’austo, nèh.
Sole d’austo, nèh.

Dicette ‘a mamma:
“Figlia, arrassusìa,
attienta a te mo ch’è venuta Está,
‘o sole coce e ‘ncapa puó’ piglià
na malatia.
Va’ pe’ sotto ‘e ffresche frasche,
chisto è ‘o ‘mbrello e ‘o sciosciamosche,
nun te sperdere ‘int’ ‘o bosco,
taglia ll’erba e torna ccà”.

Bona gè’,
sentite appriesso ‘o fatto comme va,
comme va,
comme va.

Figliole d’Antignano, bona gè’,
‘o cunto ‘e Mariarosa è chistu ccà.
Sunava già p’ ‘a via quacche zampogna,
sfrunnate erano ll’arbere ‘ncampagna,
friddo ‘a matina ca spaccava ll’ogne.
Natale e neve, nèh.
Natale e neve, nèh.

Dicette ‘a mamma:
“Figlia, arrassusìa,
attienta a te ca friddo e gelo fa.
Cummògliate si no ce puó’ appezzà
na purmunìa.
Miettatélla, tutt’ ‘e ssere,
na pettiglia a carne annura,
‘nfacci’ ‘ô ffuoco d’ ‘o vrasiere
sotto e ‘ncoppa t’hê ‘a scarfà”.

Bona gè’,
sentite appriesso ‘o fatto comme va,
comme va,
comme va.

Figliole d’ Antignano, bona gè’,
‘o cunto ‘e Mariarosa è chistu ccà.
Dicette ‘a mamma:
“Guàrdate ‘int’ ‘o specchio,
che só’ sti duje canale sott’a ll’uocchie?
Che scuorno hê dato a me, povera vecchia”.
Abbrile, abbrile, oje mà’.
Abbrile, abbrile, oje mà’.

Diciste: “Attient’ô sole figlia mia
ca ‘o sole pò fá male ‘int’a ll’està’
e attienta a te quann’è Natale
e fa friddo p’ ‘a via.
Ma pecché po’, a Primmavera,
nun diciste a chistu core:
statte attiento pe’ ll’ammore
ca, d’abbrile, attuorno va?”

Bona gè’,
‘o fatto ‘e Mariarosa è chistu ccà,
chistu ccà,
chistu ccà.

Per i non napoletani

  • Antignano = un rione di Napoli
  • cunto = racconto
  • bona gè’ = buona gente
  • ‘chistu ccà = questo qua
  • dámmole = diamole
  • Austo= Agosto
  • arrassusìa = che non sia mai!, giammai!
  • coce = scotta
  • ‘ncapa = sul capo
  • ogne = unghie
  • pettiglia = giubbetto da donna
  • carne annura = pelle nuda
  • cummògliate= copriti
  • vrasiere = braciere
  • scarfà = riscaldare
  • Abbrile = Aprile

Argomenti trattati , ,